Portieri italian i Paris St-Germain Gianluigi Donnarumma u detyrua të dalë prej fushës pasi pësoi një dëmtim të rëndë gjatë ndeshjes me Monaco-n, sfidë e vlefshme për ligën e parë franceze.
Donnarumma mori një goditje serioze në fytyrë nga mbrojtësi i Monaco-s Wilfried Singo, lëndim që i shkaktoi gjakderdhje portierit. Ai u ndërrua në minutën e 22-të, ndërsa mbrojtësi i Monaco-s nuk u ndëshkua me karton pasi gjyqtari e cilësoi si një ndërhyrje pa qëllim.
Donnarumma-s iu desh të bënte 10 qepje në fytyrë për shkak të plagëve të shumta që mori prej takave të Singo-s, ashtu siç edhe duket në këtë foto.
Pas përfundimit të ndeshjes që shkoi në favor të PSG-së, trajneri Luis Enrique foli për incidentin serioz.
“Vendimi i gjyqtarit? Unë s’mund të bëj dot gjë. Nuk munda ta shoh aksionin, por kut ti sheh një aksion të tillë është përherë e vështirë ta gjykosh. Lojtarët nuk kanë për qëllim të dëmtojnë lojtarët. Është e vështirë të gjykosh të tilla ndeshje”
Në një lajmërim zyrtar, PSG-ja njoftoi se portieri i tyre e njëkohësisht i kombëtares së Italisë, do të vijojë të ketë ‘ekzaminime mjekësore” dhe do të “pushojë për një sërë ditësh”.