Vetëm në muajin qershor të këtij viti, janë shënuar plot 101 aksidente rrugore në Shqipëri. Sipas të dhënave zyrtare, 18 jetë janë shuar në rrugët e vendit, ndërsa 114 të tjerë kanë mbetur të plagosur.
Shumica e viktimave janë meshkujt (15), ndërsa 3 janë gra. Sipas institutit të statistikave, dita e premte mbetet ajo me më shumë aksidente në Shqipëri, me afro 20% të rasteve. E shtuna pason me numër aksidentesh, ndërsa dita me më pak ngjarje të tilla, është e mërkura.
Vendin e parë për numër aksidentesh e mban kryeqyteti me 44 të tilla, ndjekur nga Korça (11), Lezha (10). Berati e Shkodra regjistrojnë më pak aksidente përgjatë qershorit, me vetem nga një.
Në shumicën dërrmuese të rasteve, aksidentet shkaktohen si pasojë e sjelljes së drejtuesve të automjeteve (82% të rasteve). Shumica e drejtuesve që shkaktojnë aksidente, i përkasin moshave të reja (25-34 vjeç).
Përgjatë 6 muajve të fundit të këtij viti, u shënuan plot 528 aksidente rrugore, me mbi 700 persona të plagosur.