Mbrëmjen e djeshme në Prishtinë, u mbajt një protestë e madhe e inspiruar nga vrasja mizore e tragjike e Liridona Ademajt, ndërsa mbi rastin kanë reaguar dhe familjarët e të ndjerës.
Përmes një statusi në profilin e tij në rrjetin social, vëllai i Liridonës u shpreh se së bashku me nënën kanë përcjellë organizimet që janë kryer në qytete të ndryshme të Kosovës e Shqipërisë për Liridonën.
“Nuk kemi fjalë të shprehim mirënjohjen tonë për të gjitha organizimet për të nderuar Liridonen dhe për të kërkuar drejtësi për të gjitha gratë dhe vajzat e vrara.
Ditët po na bëhen edhe më të vështira dhe mezi po kalojnë e dhimbja po rritet por organizimet në shumë qytete në Kosovë dhe në Shqipëri po na japin forcë që të mos dorëzohemi.
Sonte bashkë me nanen po i përcjellim lajmet dhe marshin në Prishtinë dhe ndonëse shumë e pikëlluar, nana vazhdimisht po thotë faleminderit prej tyre që po e bëjnë këtë për Donen time.
Kampanja jonë për drejtësi fillon tash, bashkë me juve aktiviste, organizata joqeveritare dhe me mbështetjen e mediave. Ne duam drejtësi të shpejtë dhe profesionale, pa vonesa dhe pa gabime. Kriminelët duhet të kalben në burg. Asnjë grua tjetër nuk duhet të vritet. Ne besojmë në institucionet e shtetit dhe presim që të ndajnë drejtësi.”-shkruan Leonard Ademaj.