Mes viteve 1989 e 1999, Kathleen Folbigg humbi 4 fëmijët e saj. Të gjithë ishin në moshat nga 19 ditë jetë deri në 18 muajsh. Në fillimin e viteve 2000, gruaja u ndoq penalisht dhe u dënua me ‘prova’ rrethanore. Në vitin 2003, gjykata e bëri përgjegjëse nënën për vdekjen e fëmijëve, në një prej gjyqeve më të ndjekura të atyre kohëve. Kathleen Folbigg u dënua me 40 vite burgim, pavarësisht se ajo kurrë nuk pranoi se kishte vrarë apo i kishte bërë keq fëmijëve të saj.
20 vite kaluan dhe tanimë gjykata në Australi, e ka liruar gruan nga akuzat e rënda. Dikur e cilësuar si ‘nëna më e urryer’ e të gjithë Australisë, gruaja tanimë në moshë doli para mediave duke derdhur lot e duke thënë se për autoritetet kishte qenë më e lehtë t’ia hidhnin fajin asaj.
Por në fakt e vërteta qëndronte krejt ndryshe, nga akuza e 20 viteve më parë se gruaja i kishte mbytur fëmijët e saj. Një grup shkencëtarësh në imunologji, mundën të zbulojnë se vajzat e Kathleen kishin një mutacion gjenetik të njohur si CALM2 G114R, mutacion i cili shkakton arrest kardiak të paparashikueshëm. Njëjtë u gjetën të dhëna shkencore edhe për dy djemtë e Kathleen, të cilët kishin një tjetër mutacion gjenetik që ishte i lidhur me epilepsinë.
Profesoreshë Carola Vanuesa, e cila drejtoi ekipin e imunologëve, tregoi për BBC-në se në të gjithë botën me mutacionin gjenetik që shkaktonte goditje në zemër, ishin vetëm 134 raste.