Një konflikt për motive pronësie ka bërë që dy vëllezër në moshë t’i drejtohen armëve. Njëri prej tyre akualisht ndodhet në gjendje të rëndë shëndetësore.
Sherri nisi rreth orës 08:00 të mëngjesit së të mërkurës në fshatin Qukas i vjetër të Lushnjes, atje ku Haziz Musai ka goditur të vëllanë 77 vjeçar Nazif Musai me sopatë. I moshuari është kundërpërgjigjur, duke qëlluar të vëllanë me pistoletë. Hazizi është nisur me urgjencë për në spitalin e traumës në Tiranë, pasi gjendja e tij shëndetësore është kritike.
“Rreth orës 08:00, në fshatin Qukas i Vjetër, dyshohet se për shkak të konflikteve për motive pronësie, shtetasi H. M. ka goditur me mjet prerës (sopatë), vëllanë e tij, shtetasin N. M., rreth 77 vjeç, ndërsa ky i fundit ka plagosur shtetasin H. M., me armë zjarri pistoletë.
Të dy të dëmtuarit janë transportuar në spital, ku janë në kujdesin e mjekëve. Aktualisht, shtetasi H. M. është në gjendje të rëndë shëndetësore.
Shërbimet e Policisë kanë shkuar menjëherë në vendin e ngjarjes, ku kanë sekuestruar në cilësinë e provës materiale, armën e zjarrit pistoletë dhe mjetin prerës (sopatë), të përdorura gjatë konfliktit.
Grupi hetimor po punon për të dokumentuar me prova ligjore rrethanat e rastit.”, thuhet në njoftimin e policisë.