Vodhën dy qytetarë e pikën e karburantit me një pistoletë lodër, momenti kur kapen 2 të miturit e 20 vjeçari

Dy të mitur në moshat 16 e 17 vjeç së bashku me një 20 vjeçar, kanë rënë në prangat e policisë pasi kanë grabitur dy persona dhe një pikë karburanti në Vlorë, duke përdorur një pistoletë lodër (imituese).

Policia i ka arrestuar të rinjtë në flagrancë përmes ndërhyrjes së Forcës së Posaçme Operacionale në qytetin bregdetar. Të rinjtë u arrestuan në lagjen ’10 korriku’, ndërsa këto janë pamjet e momentit të arrestimit të tyre.

Njoftimi i policisë:

Vodhën nën kërcënimin e një pistolete imituese, një shumë parash, 2 shtetasve, dhe më pas duke u larguar hynë dhe vodhën në një pikë karburanti, xhiron ditore, falë reagimit të menjëhershëm të shërbimeve të Komisariatit të Policisë Vlorë, në bashkëpunim me Forcën e Posaçme Operacionale të DVP Vlorë, kapen dhe vihen në pranga 3 autorët e dyshuar.

Sekuestrohen arma imituese pistoletë me silenciator, shuma e parave dhe aparati celular, të dyshuar të vjedhura, një mjet prerës (thikë) dhe automjeti që autorët kanë përdorur për t’u larguar nga vendi i ngjarjes.

Shërbimet e Komisariatit të Policisë Vlorë, në bashkëpunim me Forcën e Posaçme Operacionale të DVP Vlorë, pas marrjes së njoftimit, në mesnatë, se tre persona të paidentifikuar, nën kërcënimin e një arme imituese pistoletë me silenciator, i kishin vjedhur një shumë parash (portofolin) dhe një aparat celular, dy shtetasve dhe më pas ishin larguar, duke shkuar po me këtë send, në një pikë karburanti, dhe nën kërcenimin e kësaj arme imituese, kishin vjedhur xhiron ditore, menjëherë kanë organizuar operacionin policor të koduar “Storm 16”, për identifikimin dhe kapjen e tyre.

Falë reagimit të menjëhershëm të shërbimeve të Policisë, në lagjen “10 Korriku” u bënë të mundur lokalizimi dhe kapja e tre aurorëve të dyshuar, A. M., 20 vjeç, një 16-vjeçar dhe një 17-vjeçar.

Në cilësinë e provës materiale u sekuestruan një armë imituese pistoletë me silenciator, një shumë parash, portofoli dhe aparati celular, të dyshuar të vjedhura, një mjet prerës (thikë), 2 maska mjekësore dhe automjeti tip “Audi” që autorët kanë përdorur për t’u larguar nga vendi i ngjarjes.

Në vijim të veprimeve u bë arrestimi i tre shtetasve dhe materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme procedurale.