Një çift të moshuarish janë gjetur të vdekur brenda banesës së tyre në fshatin Bodrishtë të Dropullit. Kanë qenë fqinjët ata që kanë alarmuar policinë, pasi kanë gjetur Kosta e Kleoniqi Ilian, të dy në të 80-tat, të pajetë në banesë.
Hetuesit kanë mbërritur në vendin e ngjarjes dhe nga këqyrja e deritanishme, rezulton se në trupat e çiftit të të moshuarve ka shenja të dhunës. Dyshohet se ato janë shkaktuar me mjete të forta.
Por ndryshe nga shenjat mbi trupat e të ndjerëve, në banesë nuk ka asnjë shenjë të thyerjes që mund të nënkuptonte një grabitje të shkuar keq. Nga këqyrja tërësore e shtëpisë, nuk janë gjetur shenja të thyerjes apo çrregullime të orendive.
Hetuesit vijojnë punën për të zbuluar se kush i ka vrarë të moshuarit.
“Rreth orës 08:00, janë gjetur nga fqinjët, të pajetë, në banesën e tyre në fshatin Bodrisht, shtetasit K.I, 84 vjeç dhe K.I, 88 vjeçe (bashkëshortë). Nga këqyrjet paraprake të trupave të 2 shtetasve, janë konstatuar shenja dhune, dyshohet të shkaktuara me mjete të forta rrethanore. Gjithashtu, nga këqyrja paraprake e vendit të ngjarjes, nuk janë konstatuar thyerje të dyerve apo dritareve, si dhe në brendësi të banesës nuk janë konstatuar çrregullime të orendive”, njoftoi policia.