Prej disa ditësh në zonën detare mes ishujve Santorini e Amorgos janë regjistruar një numër i lartë tërmetesh e pasgoditjesh, lëkundje të cilat kanë larguar mijëra qytetarë nga ishujt dhe shpalljen e gjendjes së jashtëzakonshme.
Më shumë se 7.700 tërmete janë regjistruar nga 26 janari deri më 4 shkurt, sipas një njoftimi urgjent të lëshuar nga Universiteti Kombëtar dhe Kapodistrian i Athinës (EKPA).
Në raportet e bëra publike nga ekspertët, vihet në dukje se përveç tërmeteve, rrezik serioz paraqesin rrëshqitjet e dheut, veçanërisht në ishullin e Santorinit.
Tërmetet ndërkohë vijojnë në këtë zonë. Të mërkurën u shënua dhe lëkundja më e fortë me magnitudë 5.2 Rihter.
Shkencëtarët dhe sizmiologët grekë bashkohen në një pikë, rreth skenarëve që pritet të ndodhin në Santorini e ishullin e Amorgos-it. Sipas Komitetit grek të Rrezikut Sizmit dhe Vullkanit, pritet që lëkundjet sizmike të vijojnë edhe për ditë të tjera, ose të përfundojnë me ardhjen e një tërmeti me magnitudë të lartë.
Në mbledhjet e komisionit, kreu i tij tha se pritshmëritë për një tërmet me magnitudë 6.2 apo 6.5 ishin shumë të vogla. Por më të pritshme ishin shanset për rënien e një tërmeti me magnitudë 6.
Një shqetësim tjetër është dhe mundësia e aktivizimit të vullkanit në ishullin e Santorinit. Por shkencëtarët grekë vlerësojnë se nuk pritet që këto tërmete të aktivizojnë aktivitetin vullkanik në Santorini.