Arkeologët thonë se kanë gjetur pjesën e fosilizuar të një fytyre njerëzore, e cila daton të jetë mbi 1 milionë vjeçare.
Kafka jo e plotë është një pjesë e faqes së majtë dhe nofullës së sipërme, e gjetur në një shpellë në veri të Spanjës. Në bazë të datimit të kryer, fosili besohet të jetë mes 1.1 deri në 1.4 milionë vjeçare, sipas hulumtimit të botuar në revistën e njohur “Nature”.
“Gjetja e fosilit është emocionuese”, tha Eric Delson, paleontolog në Muzeun Amerikan të Historisë Natyrore, i cili nuk ishte i përfshirë në studimin në fjalë. “Është hera e parë që kemi gjetur fosile të rëndësishme më të vjetra se 1 milion vjet në Evropën Perëndimore”.
Kafka e pjesshme e gjetur në Spanjë është prova e parë që tregon qartë se paraardhësit njerëzorë “po lëviznin drejt Evropës” në atë kohë, tha Rick Potts, drejtor i Programit të Origjinës Njerëzore pranë Muzeut Smithsonian.
Kafka e pjesshme ka shumë ngjashmëri me specien njerëzore Homo erectus, por ka edhe disa dallime anatomike, tha bashkëautorja e studimit Rosa Huguet, arkeologe në Institutin Katalan të Paleoekologjisë Njerëzore dhe Evolucionit Social në Tarragona të Spanjës.
“Specia Homo erectus besohet të ketë jetuar rreth 2 milion vjet më parë dhe u zhvendos nga Afrika në rajonet e Azisë dhe Evropës, me individët e fundit që vdiqën rreth 100,000 vjet më parë”, tha Potts.
“Mund të jetë shumë e vështirë që të identifikosh se cilit grup njerëzish të hershëm i përket një gjetje fosile nëse ka vetëm një fragment të vetëm kundrejt shumë kockave që tregojnë një sërë karakteristikash”, tha paleoantropologu i Universitetit të Zyrihut, Christoph Zollikofer, i cili nuk ishte i përfshirë në studim.