Një burrë 44 vjeçar me nënën e tij 67 vjeçare janë arrestuar nga policia në Sarandë nën akuzën se kanë përdorur për qëllime përfitimi monetar një djalin/nipin 10 vjeçar.
10 vjeçari përdorej nga i ati dhe gjyshja për të krijuar video në rrjetin social Tik Tok, video në të cilat fëmija përdoret fjalor banal dhe fyes. Qëllimi i videove ishte përfitimi monetar.
Rastin e ka denoncuar nëna e 10 vjeçarit, e cila i ka treguar policisë së ish bashkëshorti së bashku me të ëmën e përdornin djalin për video me përmbajtje fyese dhe me qëllim përfitimin e sa më shumë parave.
44 vjeçari së bashku me nënën e tij 67 vjeçare u arrestuan në Sarandë, ndërsa çështja do të gjykohet në gjykatën e Beratit. Denoncimi u krye në komisariatin e policisë së Kuçovës, ndërsa hetimet kanë zgjatur afro 2 muaj.
Njoftimi i policisë Kuçovë:
Finalizohet pas 2 muajsh hetime me metoda proaktive, operacioni policor i koduar “Shoë”. Operacioni, nga Komisariati i Policisë Kuçovë, në bashkëpunim me Komisariatin e Policisë Sarandë, në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Berat. Shfrytëzonin një të mitur 10 vjeç, me qëllim përfitimin nga rrjeti social TikTok, duke postuar video të tij, me fjalë denigruese dhe banale, vihen në pranga 2 shtetas (babai dhe gjyshja e të miturit).
Specialistët e Seksionit për Hetimin e Krimeve të Komisariatit të Policisë Kuçovë, pas kallëzimit të marrë në muajin dhjetor 2023, nga shtetasja E. A., se ish-bashkëshorti i saj dhe nëna e tij, postonin në rrjetin social TikTok, video ku shfaqej djali i saj i mitur 10 vjeç, duke përdorur fjalë denigruese dhe banale, menjëherë kanë referuar materialet në Prokurorinë pranë Gjykatës së Shkallës së Parë të Juridiksionit të Përgjithshëm Berat, e cila regjistroi procedimin penal për këtë rast.
Si rezultat i hetimeve dymujore me metoda proaktive, u bë shpallja në kërkim e shtetasve A. K. dhe N. R. Pas sigurimit të inteligjencës policore, nga specialistët për Hetimin e Krimeve të Komisariatit të Policisë Kuçovë, për vendndodhjen e këtyre 2 shtetasve, u organizua në bashkëpunim me Komisariatin e Policisë Sarandë, operacioni policor i koduar “Shoë”. Në kuadër të operacionit, u kapën në Sarandë, 2 shtetasit e shpallur në kërkim, të cilët më pas u shoqëruan në Komisariatin e Policisë Kuçovë, për veprime të mëtejshme procedurale.
Në përfundim të veprimeve të kryera në drejtimin e Prokurorisë pranë Gjykatës së Shkallës së Parë të Juridiksionit të Përgjithshëm Berat, specialistët për Hetimin e Krimeve të Komisariatit të Policisë Kuçovë kanë ndaluar shtetasit A. K., 44 vjeç dhe N. R., 67 vjeçe, të dy banues në Sarandë. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.