Prej 5 vitesh, Juliani 19 vjeçar vuajti pasojat e një sëmundje që të vret dalëngadalë. Trupi i tij u përkul prej skoliozës, organet nisën t’i shtypen, ndërsa dhimbjet nuk pushuan për 5 vite me radhë.
“Për Shqiptarët” e solli në vëmendje të bamirësve historinë e tij të dhimbshme dhe javën që lamë pas, mijëra donacione bënë të mundur shumën për operimin e tij.
“Sot do të futem në opeacionin që kaq shumë e kam pritur, ndihem i lumtur e kam pak frikë. Shpresoj të dal mirë prej operacionit, trupin ta kem të drejtë.”-thotë Juliani.
“Jam edhe e lumtur e kam frikë… shpresoj që të dalë mirë djali. Ishalla do Zoti djali do të dalë mirë e do ta heqë dhe këtë siklet, të realizojë ëndrrat e veta si të gjithë të tjerët.”-tregon nëna e Julit.
Tanimë erdhi momenti i shumëpritur, që Juli të hyjë në sallën e operimit. Nëna e tij nuk mund t’i mbajë dot më lotët, ndërsa ankthi për të birin i pushton të gjithë trupin.
“Do dalësh mirë o bir, o shpirti im, do bëjë Zoti mirë”-i thotë Afërdita të birit dhe e puth për herë të fundit.
Pas disa orësh pritje, vjen lajmi që të gjithë prisnim. Juliani përfundoi me sukses ndërhyrjen. Fatmirësisht gjithçka shkoi mirë. Pas 5 vitesh ankthi e vuajtje, Afërdita ka arsye për të buzëqeshur.
“Juliani e përfundoi me sukses operacionin. Falenderoj Fondacionin Firdeus dhe të gjithë shqiptarët që kontribuan, i falenderoj shumë shumë nga zemra. Pa to unë nuk e bëja dot kurrë këtë operacion. Jam shumë e lumtur, iu shpëtua jeta djalit. Tani djali im do të jetë normal, si të gjithë të tjerët.”-thotë nëna.