Prej 5 vitesh të gjata duroi dhimbjet. Duroi sepse tjetër gjë nuk kishte çfarë të bënte. Jeton me qira i vetëm me të ëmën dhe vëllain e motrën. Për 5 vite të gjata Juli i duroi dhimbjet sepse ëndërr ka të mos shohë nënën duke u rroptuar në punë e vetme, për të nxjerrë bukën e gojës. Juli ka ëndërr që të bëhet i aftë për punë dhe të jetë ai krahu i fortë ku mund të mbështeten nëna, vëllai e motra.
Por fatkeqësisht, sëmundja qe më e fortë. Skolioza ia përkuli trupin Julit. Dhimbjet i janë bërë të padurueshme, të forta si tehu i thikës. Fatkeqësisht sot ëndrra e Julit po venitet, sepse ai nuk ka asnjë mundësi të përballojë shpenzimet për operimin. Sot Juli është i hidhëruar jo vetëm se skolioza mund t’ja marrë jetën një ditë, por se ai nuk mundet dot më t’i dalë në krahë nënës.
Përmes një thirrje të ndjerë, Juli kërkon ndihmën e shqiptarëve në këto ditë të mbetura të muajit të bekuar të Ramazanit. Një thirrje që Juli shpreson të dëgjohet nga shqiptarët bamirës.
“Nëqoftëse nuk bëhet operacioni, gjendja do të vijë duke u përkeqësuar. Do të dëmtohen organet e brendshme nga deformimi, do të paralizohesh… ose më keq do të humbësh jetën. Dëshira ime më e madhe është të shërohem, i lutem të gjithë shqiptarëve të më ndihmojnë të bëj operacionin.”-thotë Juli.