Kurrë nuk e kishte menduar se pas aq shumë sprovash që do të kalonte, do të vinte dita kur jeta e të birit do të vihej në rrezik.
Kjo është jeta e një nëne nga Librazhdi, që sot derdh lot dëshpërimi për të birin 19 vjeçar.
“Kam vuajtur shumë. Kam qenë e vetme, i kam përballuar të gjitha vetë. Vetë burrë, vetë grua. Tani që mezi prita të rriten fëmijët, thashë të bëhen të paktën për veten… tani doli kjo. Më ka këputur shpirtin, sepse djali është i madhi, do të ishte… do të bëhej i zoti i shtëpisë.”-tregon Afërdita.
Juliani 19 vjeçar nisi të përjetojë probleme me shtyllën kurrizore afro 5 vite më parë. Fillimisht Juli i injoroi dhimbjet duke menduar se ishin thjesht pasojë e lodhjes apo gjumit rraskapitës në divanin e vjetër. Por shumë shpejt dhimbjet u bënë therëse, derisa ai u bë për spital. Atje mjekët i treguan lajmin e hidhur… se ai vuante nga skolioza.
Në mes të lotëve, nëna e Julit tregon se tanimë i biri nuk është më as për veten. Mjerimit që kësaj familje i ka zënë derën përditë, iu shtua krejt papritur sëmundje e rëndë e 19 vjeçarit, një sëmundje që sot i rrezikon jetën Julit.
“Unë kam probleme me shtyllën kurrizore, me sëmundjen që quhet skoliozë. Më merret fryma, më dhemb kurrizi e s’mund të eci dot shumë. Më shumë rri vetëm, rri i distancuar nga të tjerët, sepse më duket vetja ndryshe.”-tregon vetë 19 vjeçari.
Nga ana tjetër, Afërdita përpos lotëve nuk ka gjë tjetër. E pamundur, në kushte tepër të vështira ekonomike, ajo i lutet shqiptarëve për ndihmë. Kjo nënë nuk e duron dot më atë pamje të dhimbshme të të birit, i cili dita ditës përkulet edhe më, ndërsa organet shtypen e kërcënojnë jetën e 19 vjeçarit.
“Në kushtet që është, nuk është as për vete djali. Edhe të vdes nuk kam gajle, vetëm Juli të më bëhet mirë. Të mos më vuajë, të mos e shoh më kështu (qan). Unë lutem, i lutem shqiptarëve të më ndihmojnë Julianin. Vetë nuk mundem.”-thotë Afërdita.