Një avion spitalor u rrëzua mbrëmjen e të premtes në Filadelfia të SHBA-ve, afro një minutë pasi ishte ngritur nga aeroporti. 6 persona ishin në bordin e avionit, mes tyre një vajzë që shoqërohej nga e ëma. Të gjithë personat në bord vinin nga Meksika dhe kishin për destinacion final Tijuanën.
Avioni u rrëzua në një zonë të populluar në rrethinat e qytetit, duke goditur disa godina e automjete. Autoritetet ende nuk kanë dhënë një numër të saktë të viktimave.
Një zëdhënës i kompanisë që zotëronte avionin, tregoi se ata kryenin shërbime spitalore dhe se avioni që u rrëzua ishte në kushte perfekte.
“Jemi të shokuar nga kjo tragjedi. Ekuipazhi përbëhej nga veteranë. Ne jemi kompani që japim shërbim të avionëve spitalore, fluturojmë 700 herë në vit. Në të vërtetë ende nuk e dimë se çfarë ka ndodhur”-tha zëdhënësi, raportoi Reuters.
Kalimtarë të rastit dhe kamera sigurie, kanë filmuar momentin kur avioni rrëzohet.