Në rrjetet sociale të gjitha fotot e tyre ishin të lumtura, me buzëqeshje e me momente të gëzuara. Por akti i fundit i martesës së një çifti shqiptar, përfundoi me një tragjedi të dyfishtë në Greqinë fqinje. Kryefamiljari 53 vjeçar goditi me thikë për vdekje të shoqen 44 vjeçare, duke e lënë të vdekur në banesën e tyre në Selanik. Pak momente pas krimit, 53 vjeçari është hedhur nga ballkoni i shtëpisë duke i dhënë kështu fund jetës.
Dy vajzat e çiftit, 16 e 21 vjeçe kanë mbetur jetime dhe në gjendje shoku pas asaj që ka ndodhur.
Media greke ka marrë në intervistë disa prej familjarëve dhe të afërmve të viktimave, për të kuptuar më shumë mbi krimin e dyfishtë, motivet e të cilit ende nuk janë zbardhur nga hetimi.
Të gjitha ata që e njihnin çiftin thonin se të dy ishin njerëz të qetë dhe se asnjëherë nuk i kishin parë duke u zënë. Edhe fqinjët nuk kanë raportuar asnjë zhurmë apo ngritje zëri të dëgjuar, pak para se të ndodhte krimi pasditen e të mërkurës.
Në rrjetet sociale kryefamiljari postonte veçse momente të bukura që kishte kaluar me të shoqen dhe vajzat apo të tjerë pjesëtarë të familjes.
Një prej mikeshave të afërta të viktimës tha se 44 vjeçarja i kishte tregua që kishte patur probleme e zënka me të shoqin.
“Ajo ishte një grua e jashtëzakonshme. Ishte e qetë dhe kujdesej shumë për vajzat e saj. Më tregoi se kishte disa probleme me të shoqin, por nuk më dha detaje. Ajo kishte përherë një buzëqeshje në fytyrë dhe me buzëqeshje përballej me të gjitha, pa u ankuar asnjëherë”-tregoi e mikesha e viktimës.