Për thuajse një dekadë një luftë civile ka gjunjëzuar Jemenin, duke e çuar shtetin më të varfër në gadishullin e Arabisë, fare pranë kolapsit total. Fatbardhësisht ka patur shumë më pak dhunë pas arritjes së armëpushimit vitin e kaluar, por ende shenjat e përfundimit të konfliktit janë të largëta.
E në mesin e kaosit të luftimeve, BBC vizitoi 2 vite më parë një vogëlush të quajtur Ahmed. I verbër që nga lindja, Ahmed tregonte se bombat e luftimeve kishin shkatërruar shkollën ku ai mësonte. Edhe pse pa çati e mue, sërish Amed vijonte shkollën e madje edhe ndihmonte mësuesit me fëmijët më të vegjël në moshë. Pikërisht falë mesazheve prekëse të Amedit (9 vjeçar në atë kohë), disa bamirës i erdhën në ndihmë komunitetit atje për të ndërtuar një shkollë të re për fëmijët (në qytetin e Taiz).
Ahmedi, tanimë 11 vjeçar, shprehet i lumtur se ka kontribuar disi për vendin e tij dhe thotë se ka ëndrra të mëdha për të ardhmen.
Për më tepër shikoni videon
Historia nga viti 2021: Kur nuk vjen mësuesi, ky 9 vjeçar i verbër u mëson vogëlushëve Kur’anin dhe shkencat
Këtu jemi në një qytet të konsumuar nga lufta. Taiz quhet qyteti dhe ndodhet në Jemen. Luftimet atje vijojnë, ndërsa qindra fëmijë marrin përditë përsipër rrezikun për të shkuar në shkollë.
Por shkolla nuk është si ajo që jemi mësuar të shohim. Këtu shkolla nuk ka as mure, dritare apo tavan.
Pikërisht këtu disa mësues u japin dijet e para fëmijëve të vegjël. E kur ata nuk ndodhen aty, ai që merr përsipër të mësojë është ky 9 vjeçar. Ahmed quhet. BBC i ka kushtuar një kronikë këtij djaloshi, i cili që nga lindja është i verbër. Pavarësisht, Amed i mëson vogëlushëve, ashtu siç thotë ai vetë, ato që tashmë ai i di.
“U mësoj nxënësve atë që unë tashmë e kam mësuar. Më të thjeshtat për mua janë Kur’ani dhe shkencat… këtu neve na duhet gjithçka. Një shkollë e re, klasa, banka, dyer e dritare, drita…Na duhet një ndërtesë ku ka çati e mure që era e shiu të mos hyjnë brenda.”-thotë 9 vjeçari për BBC.
“Të shtëna dëgjojmë përherë. Ndonjëherë kur i dëgjoj të shtënat, më duket sikur do të vdes.-thotë Ahmedi.
“Kemi shumë frikë nga të shtënat, mos plumbat vijnë këtu… kemi shumë frikë nga minat. Në shkollë vijmë dhe ikim duke marrë rrezik shumë të madh, por ne duam të vijmë të takojmë shokët e shoqet, të mësojmë që kur të rritemi të bëhemi diçka, nëse Zoti i madh e lejon”-thotë kjo vajzë e vogël.
Një në çdo 5 shkolla në Jemen ka dalë jashtë përdorimit, por tek kjo godinë e rrënuar, mësuesit kanë vendosur që të vijojnë mësimin pë të mos i lënë fëmijët analfabetë.