Nuk pranoi se arsyeja se përse qëlloi të shoqen disa herë me thikë, të kishte qenë xhelozia dhe fakti se ai shpesh herë vinte i dehur në shtëpi.
Fill pas vetëdorëzimit të tij në polici, Aleko Myrtollari ka folur përpara hetuesve duke thënë se e qëlloi me thikë të shoqen pas debateve në lidhje me gjetjen e një pune. 46 vjeçari tregoi se i kishte kërkuar të shoqes të gjente e niste një punë, kërkesë që sipas tij ajo e kishte refuzuar.
Pas konfliktit, situata ka agravuar e mandej 46 vjeçari e ka qëlluar me thikë gruan. Marjola ndodhet ende në gjendje të rëndë shëndetësore, në spitalin e Traumës në kryeqytet.
Çifti me fëmijë të mitur kishin pak kohë që kishin ardhur në Korçë, pas jetesës në Tiranë. 46 vjeçari punonte me intervale kohore në Greqi. Ngjarja e rëndë ndodhi mbrëmjen e 4 qershorit, ndërsa autori për dy ditë arriti të fshihej derisa u vetëdorëzua mbrëmjen e djeshme.
Kujtojmë se në harkun kohor të 5 muajve, 8 gra kanë humbur jetën në Shqipëri, krime që në shumicën dërrmuese kanë ndodhur nga duart e bashkëshortëve apo të afërmve të tyre.