Një ngjarje e rëndë ndodhi disa ditë më parë në Shkodër, atje ku një fëmijë 3 vjeçar humbi jetën e bashkë me të dhe e motra, e cila u dërgua me urgjencë në gjendje të rëndë drejt kryeqytetit.
Fatmirësisht, pas 10 ditësh në terapi intensive në reanimacionin e pediatrisë në kryeqytet, 7 vjeçarja ka mundur t’i shpëtojë rrezikut për jetë. Ajo ndodhet në gjendje të mirë shëndetësore dhe prej 3 ditësh ka lënë spitalin.
Ngjarja e rëndë u raportua më 24 shkurt, kohë kur 3 vjeçari erdhi në urgjencën e spitalit të Shkodrës në gjendje kritike për jetën. Mjekët tentuan rianimimin por vogëlushi vdiq pak minuta më vonë në repartin e reanimacionit.
Bashkë me të familjarët kishin sjellë dhe vajzën 7 vjeçe, e cila po ashtu ishte në gjendje të rëndë. Ajo u dërgua me urgjencë drejt Tiranës dhe arriti t’i shpëtojë vdekjes.
Në lidhje me shkakun, prokuroria e Shkodrës ende nuk i ka përfunduar hetimet. Nga të dhënat e bëra të ditura deri më tani, dyshohet se motër e vëlla janë helmuar nga pesticidet që familjarët kishin spërkatur në një magazinë pranë shtëpisë së tyre në fshatin Mjedë të Vaut të Dejës.
Hetuesit kanë kryer analizat toksikologjike, ndërsa përgjigja e tyre do të hedhë më shumë dritë mbi ngjarjen.