Është arrestuar një ditë pas shpalljes së tij në kërkim një 36 vjeçar, papërgjegjshmëria e të cilit solli djegien e pjesshme të tre banesave dhe një sipërfaqe të madhe toke.
Ditën e djeshme në orët e paradites në fshatin Livinë të Finiqit, 36 vjeçari me incialet M.B, ndezi një zjarr në tokën e tij. Si pasojë e erës, flakët nisën të përhapen, duke djegur 3 banesa. Sapo pa që situata po dilte jashtë kontrollit, i riu u largua.
“Kapet dhe vihet në pranga 36-vjeçari që i vuri zjarrin tokës së tij, ditën e djeshme, dhe nga përhapja e flakëve u përfshi një sipërfaqe shumë e madhe, u dogjën pjesërisht 3 banesa dhe u rrezikuan disa të tjera.
Strukturat hetimore të Komisariatit të Policisë Sarandë, në bashkëpunim me shërbimet e Forcës së Posaçme “Shqiponja” dhe të Patrullës së Përgjithshme, pas informacioneve të siguruara nga inteligjenca policore, lokalizuan, kapën dhe ndaluan shtetasin në kërkim M. B., 36 vjeç, banues në fshatin Livinë, Finiq.
Ky shtetas dyshohet se më datë 11.09.2023, rreth orës 11:00, ka ndezur zjarr në tokën e tij, në fshatin Livinë, bashkia Finiq dhe kur pa parë se zjarri po dilte jashtë kontrollit, është larguar. Zjarri, i favorizuar nga era, mori përmasa dhe për pasojë u dogjën pjesërisht 3 banesa në fshatin Livinë.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme, për veprën penale “Shkatërrimi i pronës me zjarr”.”-njoftoi policia.