Një ngjarje e rëndë ka ndodhur në Irlandë, atje ku një atlete shqiptare ka humbur jetën si pasojë e një aksidenti automobilistik.
Ngjarja ka ndodhur mëngjesin e të dielës në Tralee të Irlandës, kohë kur 48 vjeçarja shqiptare Anila Muçaj po vraponte së bashku me dy shoqet e saj në rrugë. Një makinë me drejtues një 80 vjeçar ka përplasur shqiptaren duke i marrë jetën.
Media vendase shkruan se i moshuari ka patur probleme shëndetësore, ka humbur kontrollin e automjetit e ka goditur 48 vjeçaren shqiptare.
Anila Muçaj ishte nënë e dy fëmijëve. Ajo u dërgua me urgjencë në spital, por nuk mundi t’i mbijetonte plagëve.
Dy mikeshat e Muçajt po ashtu u plagosën. Ato u dërguan me urgjencë në spital dhe janë jashtë rrezikut për jetën. I moshuari po ashtu u dërgua në spital.
Anila ishte anëtare e klubit sportiv “Born to Run” në Tralee dhe kishte marrë pjesë në disa maratona vitet e fundit. Kryetari i Bashkisë së Tralee, Mikey Sheehy, e përshkroi këtë ngjarje si një “tronditje të madhe” për qytetin dhe theksoi se Anila ishte një vrapuese e përkushtuar dhe një person i dashur për komunitetin.