“O shpirti i mamit… ti je gëzimi jonë, drita e syve tanë (qan). O shpirt, do të bëhesh mirë, të dy do ta luftojmë këtë luftë që kemi nisur.”
Këto janë fjalët e një nëne që vuan prej vitesh. I biri i saj Darjani është i sëmurë rëndë. Darjani është veçse 16 vjeç dhe është i prekur nga tromboza veno porta, një sëmundje që ia ka rrëmbyer fëmijërinë dhe tani i rrezikon jetën.
Herën e fundit që Darjani shkoi në spital, hemorragjia që i kishte plasur në trup i rrezikoi seriozisht jetën. Ende jeta e tij është në rrezik. Nga momenti në moment. Mes lotëve që i mbulojnë faqet, Juliana kujton momentin kur doktori i tha se i biri ka veçse dy muaj jetë.
“Të shikosh fëmijën e të mendosh fundin… është tmerr për prindërit, një tmerr i vërtetë. Kur më thanë doktorët që edhe dy muaj jetë ka. Çdo natë rrija zgjuar, dëgjoja a merrte frymë djali. Ishte një tmerr i vërtetë. Të mendosh se çdo sekondë për atë është shpresë… (qan).”-rrëfen nëna e Darjanos.
Familja nga Skrapari ka nevojë për ndihmë. Darjano ndodhet në gjendje kritike për jetën, pasi një hemorragji tjetër mund të rezultojë fatale për të. Në pamundësi ekonomike, familja lutet për ndihmë këtë natë Ramazani.
