Qëkur erdhi në këtë botë 1 muaj më parë, kjo vogëlushe që shihni në fotot e mëposhtme nuk mundi të ndjejë erën dhe prekjen e nënës. Një sëmundje e rëndë e dërgoi Solein e vogël menjëherë në sallën e operimit e për 1 muaj me radhë, ajo qëndroi e intubuar në një inkubator.
Thirrjes e lotëve dëshpërues të dy prindërve të saj në këtë muaj Ramazani, iu përgjigjën me lutje e donacione shqiptarët bamirës. Fondet për kurimin e Soleit të vogël u mblodhën brenda 48 orëve dhe tanimë vogëlushja është nisur drejt Italisë fqinje për kurim.
I gëzuar dhe mbushur plot shpresë, babai i vogëlushes falenderon nga zemra të gjithë ata që dhanë diçka nga vetja për foshnjen e tij.
“Jam shumë i lumtur që po ia jepni këtë mundësi vajzës sime, neve. Falenderoj Fondacionin Firdeus, Elvis Naçin për këtë mundësi të madhe qe na keni dhënë. Unë mendoj se vajza do të kthehet e shëruar, kam shpresë tek Zoti. Faleminderit të gjithëve, u jam shumë mirënjohës të gjithë jetën.”-tha babai i Soleit.
Në aeroport, pak para nisjes me të bijën, nëna e Soleit shoqërohet nga Fatma. Në fytyrën e Kledianës është stampuar një ndjenjë lehtësimi e çlirimi, teksa ajo pret me padurim të niset sa më parë, atje ku do të vijojë të jetë një hap më afër ëndrrës për të parë të bijën të shëruar.
“Një muaj e gjysëm, vetëm spitalet pamë. E tani i erdhi fundi. Shpresojmë, veç me shpresën tek Zoti. Unë i jam falenderuese shqiptarëve, e juve gjithashtu. Pa shqiptarët e pa ju, nuk do të mundeshim. Ndoshta kthehem me të në dorë, ndoshta kthehem në atdhe me vajzën në dorë… (qan)”-thotë Klediana.
Tanimë koha ka ardhur. Solei vendoset në avionin spitalor dhe gjithçka është gati. Nuk na mbetet veçse të lutemi për shërimin e plotë të vogëlushes, me shpresën se nuk do të vonojë dita që ajo do të rikthehet në atdhe me nënën që e mban në krahët e saj.
