Kur erdhi në jetë, të qarat e të bijës ishin momenti më i lumtur për Sheiden. Por për këtë nënë nga Kosova, tanimë të qarat e vogëlushes, janë tingulli më i mprehtë që ia shpon zemrën prej 5 muajsh.
Klea është sëmurë rëndë, me tumor në tiroide e sëmundje në veshka e mëlçi. Klea prej 5 muajsh vetëm qan prej dhimbjeve, e bashkë me të, ditë e natë, edhe e ëma.
Sheidja e merr në krahë të bijën, për t’u munduar ta qetësojë. Janë të pakta, si oazet në shkretëtirë, çastet kur buzët e vogëlushes ndalen. Por është dhimbja e Sheides, ajo që nuk ndalet sot e 5 muaj me radhë. Kjo nënë po kërkon ndihmë. Ka frikë se do vijë dita që e bija do t’i vdesë në krahë. Një frikë që ia mban të mbërthyer fort zemrën.
“Vajza ime e ka emrin Klea, ka tumor në tiroide unë e di, zemra ime e di qysh jam duke ndejt këtu…(qan) Nuk e di as vetë çfarë të bëj, kur po qan vajza po qaj dhe unë (qan) Unë nuk mundem të jetoj pa vajzën. E falenderoj Zotin që ma ka fal, dashtë Ai la ymër e jeton, ma shëroni këtë fëmijë”-rrëfen Sheidja, nëna e vogëlushes.