Po mbahet sot në Gjykatën e Tiranës, seanca paraprake për vrasjen e 14 vjeçarit Martin Cani, i riu i cili u godit me thikë nga bashkëmoshatari i tij pak metra larg shkollës Fan Noli në Tiranë.
Të kapur dorë për dore, në seancë kanë mbërritur prindërit e Martinit, Ëngjëlli e Florina Cani. Ata do të jenë të pranishëm në sallën e gjyqit.
Kujtojmë se vrasja e Martin Canit ndodhi më 18 nëntor të vitit të kaluar, afro 200 metër larg shkollës 9 vjeçare “Fan Noli”. 3 ditë më parë, 14 vjeçari kishte patur një konflikt me një bashkëmoshatar për motive banale. Me të përfunduar orari mësimit, adoleshentët janë takuar në një rrugicë pranë shkollës, atje ku një sherr ka nisur. Autori i krimit, Mario Përlleshi, ka nxjerrë një thikë dhe ka goditur Martinin. I riu ndërroi jetë në spital pak orë më vonë.
Në sherr u plagos dhe miku i viktimës, Luisi. Ai fatmirësisht nuk mori lëndime që t’i rrezikonin jetën, ndërsa mjekimin prindërit vendosën t’ja kryejnë jashtë shtetit, falë donacioneve të qytetarëve mbledhur përmes një fushate në GoFundMe.
Pas ngjarjes autori e hodhi çantën me armën e krimit në një ndërtesë të vjetër. Thika u gjet disa ditë më vonë, ndërsa autori krimit qëndroi po ashtu për ditë me radhë i shtruar në një spital privat. Pas disa orvatjesh, 14 vjeçari u lirua e më pas u arrestua prej policisë