Policia e Kosovës ka thënë të mërkurën se një zyrtar policor është lënduar si pasojë e sulmeve me mjete të forta.
Këtë paradite protestat e serbëve në tre komunat veriore Zveçan, Zubin Potok e Leposaviq kanë qenë përgjithësisht të qeta, por në orët e pasdites disa persona të dyshuar kanë hedhur gurë në drejtim të makinave të policisë së Kosovës.
Tre automjete janë dëmtuar ndërsa një oficer i policisë ka marrë lëndime prej sendeve të forta.
“Angazhimet policore në ruajtje të sigurisë në komunat veriore të vendit
Prishtinë, më 31 maj 2023
Policia e Kosovës në bashkëpunim dhe koordinim me institucionet e sigurisë, kanë vazhduar angazhimet në ofrimin e sigurisë dhe mbarëvajtjen e protestave të cilat janë mbajtur edhe sot pranë komunave Leposaviq, Zubin Potok dhe Zveçan.
Fillimisht protesta ishte e qetë, por në orët e pasdites në intervale të ndryshme kohore disa persona të dyshuar kanë hedhur gurë në drejtim të tri automjeteve të Policisë së Kosovës, ku dy prej tyre iu janë shkaktuar dëme materiale duke iu thyer xhamat. Si pasojë e sulmeve nga mjetet e forta një zyrtar policorë ka pësuar lëndime.
Po ashtu gjatë protestës së realizuar sot, disa media/gazetarë janë penguar e sulmuar, si dhe automjetet e tyre ishin vandalizuar nga individ/grupe kriminale. Pengimi i gazetarëve në detyrë cenon të drejtën e shprehjes, informimit dhe lirinë e shtypit.
Ne jemi të përkushtuar të hetojmë këto akte kriminale dhe të parandalojmë shfaqjen e dhunës. Njëkohësisht Policia e Kosovës u bën thirrje të gjithë protestuesve që të përmbahen nga dhuna dhe të shprehin mendimet e tyre në mënyrë paqësore.”-njoftoi policia e Kosovës