Një zënkë mes punonjësve e pronarëve të dy agjencive funerale që operojnë në Fier, ka përfunduar në një konflikt të dhunshëm ditën e martë.
Shkak për konfliktin ka qenë një zënkë për çështje të klientelës e konkurrencës mes dy agjencive. Ngjarja ka ndodhur në zonën e njohur si rruga e spitalit, ku 4 persona të njërës kompani funerale, u kanë bërë pritë dy personave (vëllezër) të agjencisë tjetër. 4 personat kanë kërcënuar me shkopa bejsbolli dy vëllezërit, duke u thënë se po i marrin klientelën. Zënka ka agravuar dhe një prej dy vëllezërve është goditur, duke mbetur i plagosur.
38 vjeçari është dërguar me urgjencë drejt spitalit. Një prej autorëve është arrestuar, ndërsa tre tjerët janë shpallur në kërkim.
Njoftimi i policisë:
Specialistët e Seksionit për Hetimin e Krimeve kundër Personit arrestuan në flagrancë shtetasin K. N., 28 vjeç, dhe shpallën në kërkim shtetasit J. M., 47 vjeç, M. S. 38 vjeç dhe E. Rr., 35 vjeç, të gjithë banues në Fier, pasi dyshohet se për motive konkurrence, kanë goditur me send të fortë dhe kanë kanosur shtetasin E. S., 38 vjeç, banues në Fier. Ky shtetas aktualisht është në kujdesin e mjekëve dhe jashtë rrezikut për jetën. Punohet për lokalizimin dhe kapjen e shtetasve të shpallur në kërkim.