Boksieri i njohur shqiptar Florian Marku është arrestuar dhe vënë në pranga në Gjermani. Marku i cili jeton në Britani, kishte udhëtuar për disa arsye personale në Gjermani më 9 dhjetor, atje ku është bërë dhe ndalimi i tij.
Boksieri ishte shpallur në kërkim nga Greqia, në lidhje me një ngjarje të ndodhur atje, kur Marku ishte 18 vjeçar. Në atë kohë Marku është shpallur i fajshëm nga gjykata për akuzën e plagosjes dhe armëmbajtjes pa leje.
Florian Marku aktualisht ndodhet në Gjermani, ku dhe pret transferimin drejt Greqisë. Në lidhje me ngjarjen për të cilën ai është akuzuar nga drejtësia greke, Marku ka kryer 1.5 vite burgim, ndërsa i dënuar ka qenë me 7 vite.
Çështja është apeluar dhe sipas ligjit të Greqisë, Marku do të duhej të kryente së paku 1/3 e dënimit. Sipas përllogaritjes, Florian Markut i duhen afro 6 muaj kohë burgimi që dënimi të mbyllet përfundimisht.
Florian Marku tha se do të tërhiqej pas humbjes me Cris Congo, në mars të këtij viti. Marku jeton prej vitesh në Angli së bashku me të shoqen dhe dy fëmijët.