Familja Bytyqi nga Prizreni prej 6 muajsh endet spitaleve të Kosovës. Në rrezik serioz është jeta e pjesëtarit më të vogël të familjes, Kajanit 6 muajsh.
Kajani prej sa ka jetë ka duruar dhimbje të mëdha edhe pse kurrë nuk e ka patur mundësinë për t’i treguar vuajtjet. Ata që munden të flasin, janë nëna e familjarët e vogëlushit.
Në “Për Shqiptarët”, nëna e Kajanit tregon mes lotëve se kurrë nuk mundi dot të bëjë një shëtitje me të birin. Muret e spitaleve, janë e vetmja ngjyrë që kanë parë sytë e këtij vogëlushi.
“Djali ka lind shumë i vogël, 2 kile. Ka patur shumë vështirësi me marrë peshë. Mëlçinë e ka të dëmtuar, tanimë vetëm po përkeqësohet situata. Asnjë ditë nuk kam mundur të dal dot me djalin. Të gjitha ato ëndrra që i kam pas… gjendja e djalit, nuk e lejon me dalë.
Çohem natën, e shoh a po merr frymë. Ai po mundohet, që tani i vogël me luftu për jetën. Mjekët na kanë thënë ta çojmë urgjent jashtë shtetit, sepse këtu as dhimbjet nuk munden me ia ul.”-thotë nëna e vogëlushit 6 muajsh.