Ka humbur jetën në spitalin e Shkodrës Anila Ndoka, 44 vjeçarja e cila u qëllua me plumb në kokë nga bashkëjetuesit, 34 vjeçari Kole Manaj.
44 vjeçarja u qëllua paraditen e 18 shkurtit dhe pas 5 ditësh agonie në spital, ka mbyllur sytë përgjithmonë duke lënë pas 3 fëmijë jetimë.
Ngjarja e rëndë ndodhi në lagjen ‘Mark Lula’ në Shkodër, atje ku çifti i bashkëjetuesve kishte lënë takim. Nga automjeti i të ndjerës janë dëgjuar dy të shtëna, shkrepur nga arma që mbante 34 vjeçari. Manaj ka qëlluar në drejtim të Anilës dhe më pas i bindur se e ka vrarë, ka kthyer tytën e pistoletës drejt vetes, duke gjetur vdekjen në vend.
Kur autoritetet dhe urgjenca shkuan në vendin e ngjarjes, nëna e tre fëmijëve u gjet ende me shenja jete. Ajo u shtrua në spitalin e Shkodrës në gjendje kritike. Pavarësisht orvatjeve të mjekëve për ta dërguar në spitalin e traumës 44 vjeçaren, gjendja e saj e rëndë e bëri të pamundur transportin. Nëna e tre fëmijëve ndërroi jetë 5 ditë më vonë.
Sipas të dhënave të deritanishme, krimi ka ardhur si pasojë e mosmarrëveshjeve mes çiftit. Ndoka ka dashur t’i japë fund lidhjes me 34 vjeçarin, ndërsa ky i fundit nuk ka pranuar. Hetimet vijojnë për të zbardhur të plotë ngjarjen.