Prej dy muajsh e gjysëm, Alani ndodhet në këtë inkubator, rrethuar nga aparaturat, tubi që i jep frymë, dhimbjet dhe… lotët e nënës.
Prej dy muajsh e gjysëm, çdo ditë e moment pranë të birit që po lufton për jetën, gjendet Irena. Kjo nënë e ka parë djalin veçse prej inkubatorit dhe me lot u përgjërohet shqiptarëve bamirës për ndihmë, me shpresën e dëshirën e vetme për t’i shpëtuar jetën të birit.
“Nuk ka lëvizur nga ky inkubator prej dy muajsh e gjysëm…asnjëherë nuk e kemi marrë në krahë, as fytyrën e plotë nuk ia kemi parë se ka qenë gjithë kohën i fashuar. Gjëja më e dhimbshme është të shohësh fëmijën në këtë situatë. Neve në fillim mjekët na thanë që shanset që të shpëtojë fëmija janë shumë të vogla, është një mrekulli që ai është këtu. Jemi lutur e kemi shpresuar çdo ditë që ai të shpëtonte nga tubi, por nuk ka qenë e mundur. Ju lutem më ndihmoni. Djali duhet të ikë sa më parë jashtë shtetit, çdo orë që kalon, jeta e tij vihet në rrezik. Ju lutem na ndihmoni, duam thjesht fëmijën ta kemi mirë, ta mbajmë në krahë…”-thotë Irena.
Alani 3 muajsh ka nevojë urgjente për t’u dërguar për kurim jashtë shtetit. Vogëlushi ka lindur para kohe dhe një problem me mushkërinë i ka detyruar mjekët ta intubojnë. Mjekimi i tij nuk mund të vijojë dot më në atdhe, por familja Qosja nuk ka asnjë mundësi ekonomike për të përballuar kurimin e djalit jashtë shtetit.