Një tren me pasagjerë dhe një tren që transportonte malllra, janë përplasur kokë më kokë gjatë orëve të mbrëmjes së të martës, duke sjellë të paktën 36 viktima e dhjetëra të plagosur.
Përplasja ndodhi fill pasi treni i pasagjerëve doli nga një tunel. Në të udhëtonin rreth 350 persona, 10 prej të cilëve ishin ekuipazh.
Siç raportoi Reuters, vagonat e parë të trenit me pasagjerë u shkatërruan thuajse plotësisht nga përplasja me trenin e mallrave, ndërsa pas impaktit u shkaktuan dhe vatra zjarri.
“Kishte shumë panik, zjarri nisi menjëherë sapo trenat u përplasën, flakët mund t’i shihje ngado.”-tha Stergios Minenis, një pasagjer 28 vjeçar i cili arriti të shpëtojë nga treni duke u hedhur jashtë mjetit.
Drejtuesi i emergjencave në spitalin e Larisas Apostolos Komnos, shpjegoi se shumica e personave që kanë humbur jetën janë në moshë të re, në të 20-tat.
Ende mbetet e paqartë se përse trenat po ecnin në të njëjtat shina. Policia ka ndaluar ndërkohë personin përgjegjës për menaxhimin e shinave e hekurudhës në Larisa.
Zëdhënësi i brigadës së zjarrfikësve atje Vasilis Varthakogiannis shpjegoi për mediat greke se shpëtimi i pasagjerëve të lënduar ka qenë mjaft i vështirë për shkak të dëmit të jashtëzakonshëm që është shkaktuar nga përplasja e trenave.
“Po jetojmë në një tragjedi, po nxjerrim njerëz të gjallë, njerëz të lënduar… mes tyre ka shumë që kanë ndërruar jetë”-tregoi Varthakogiannis.