Një fëmijë që transportonte armë e municion luftarak është kapur në flagrancë nga policia e shtetit në Mirditë. Përmes informacioneve të siguruara nga inteligjenca policore, oficerët kanë bërë të mundur ndalimin e një 15 vjeçari me inicialet E.S, banues në Burrel, teksa transportonte në afërsi të fshatit Fang 3 granata, 1 kallashnikov dhe municion luftarak.
Hetuesit kanë nisur punën për të zbuluar dhe nxjerë përpara drejtësisë shtetasit e tjerë të përfshirë në këtë rast.
Njoftimi:
Si rezultat i administrimit të menjëhershëm të informacioneve të siguruara nga inteligjenca policore, se një shtetas po transportonte armë zjarri dhe armë shpërthyese, shërbimet e Komisariatit të Policisë Mirditë, në bashkëpunim me shërbimet operacionale të Drejtorisë Vendore të Policisë Lezhë, finalizuan operacionin e koduar “Sinjali”.
Gjatë operacionit u arrestua në flagrancë, në afërsi të fshatit Fang, teksa transportonte 3 granata, 1 armë zjarri kallashnikov dhe municion luftarak, shtetasi E. S., 15 vjeç, banues në Burrel.
Në drejtimin e Prokurorisë së Lezhës, të cilës iu referuan materialet procedurale për rastin, po kryhen hetime për të provuar qëllimin e transportimit të këtyre sendeve, nga 15-vjeçari, si dhe për të identifikuar dhe nxjerrë përpara përgjegjësisë penale, shtetasit e tjerë që mund të jenë implikuar në këtë rast.