Një aksident i rëndë ndodhi mbrëmjen e djeshme në Fushë-Prezë atje ku një automjet ‘Mercedes Benz’ ku udhëtonin 4 të rinj është përplasur me një betoniere. Shoferi i makinës ka goditur nga pas betonieren, ndërsa më tutje makina ka marrë flakë.
Të rinjtë që ndodheshin në veturë humbën jetën të gjithë.
Veturën e drejtonte 25 vjeçari Enejdi Laçi, ndërsa pasagjerë ishin vëllai i tij 20 vjeçari Erildi, kushëriri Andi 22 vjeçar dhe shoku i tyre Enrikejd Kurti, 24 vjeçar.
Një patrullë e policisë e ka pikasur aksidentin dhe ka njoftuar menjëherë zjarrfikësit. Këta të fundit kanë shuar flakët dhe kanë bërë të mundur nxjerrjen e trupave të pajetë nga makina.
Shoferi i betonieres, një 24 vjeçar, është larguar nga vendi i ngjarjes pas aksidentit, por është ndaluar disa orë më vonë nga policia.
Nga të dhënat e deritanishme, mendohet se të rinjtë kanë qenë duke udhëtuar me shpejtësi, ndërsa betonierja udhëtonte me shpejtësi të ulët. Mbase për shkak të ndriçimit të ulët në rrugë, të rinjtë mund të mos e kenë parë betonieren. Automjeti i të rinjve ka qenë i pajisur me impiant gazi, çka dyshohet se ka sjellë dhe shpërthimin në flakë të makinës.
Njoftimi i policisë:
Më datë 19.03.2025, rreth orës 23:50, në Fushë-Prezë, nga shërbimi i qarkullimit rrugor është konstatuar një automjet i cili kishte marrë flakë dhe para tij qëndronte një automjet betoniere.
Nga hetimet e kryera me qëllim zbardhjen e ngjarjes rezultoi se automjeti drejtohej nga shtetasi E. L., 25 vjeç dhe dyshohet se është përplasur me automjetin betoniere të drejtuar nga shtetasi A. K., 24 vjeç, i cili pas aksidentit ishte larguar nga vendi i ngjarjes.
Si pasojë e përplasjes dhe përfshirjes së automjetit nga flakët kanë ndërruar jetë drejtuesi i automjetit E. L., 25 vjeç dhe 3 pasagjerët në mjetin e tij E. L., 20 vjeç, E. K., 24 vjeç dhe A. L., 22 vjeç.
Në vijim të veprimeve u shoqërua për veprime të mëtejshme drejtuesi i automjetit betoniere shtetasi A. K, 24 vjeç.
Nën drejtimin e Prokurorisë vijojnë hetimet me qëllimin dokumentimin e plotë të ngjarjes.