Prindërit e Zeniadës, vajzës 12 vjeçare që u dogj e gjallë nga fqinji 14 vite më parë, kanë folur për herë të parë për median fqinje në Greqi. Ngjarja e ndodhur në vitin 2011, është rikthyer në hollet e drejtësisë greke, ndërsa autori akuzuar përballet tanimë me disa vepra penale të rënda.
Prindërit e vëllai i të ndjerës, kanë folur për median greke, duke kujtuar detajet e dhimbshme në kohën kur u përballën me trupin e djegur të Zeniadës në shkallët e pallatit të tyre.
“Unë kriminelin nuk e pashë. Isha në punë atë ditë. Kur u ktheva, vajzën nuk arrita ta njoh prej djegieve të mëdha. E njoha time bije vetëm nga thonjtë e gishtërinjve”-tha nëna e Zeniadës.
“Ai (autori i krimit) vinte në shtëpinë tonë çdo natë për 17 ditë me radhë, në kohën kur Zeniada ime ishte në spital. Na pyeste nëse Zeniada mund të fliste dhe se çfarë thoshe policia. Ai kërkonte të dinte gjithçka ndodhte”-tha babai i Zeniadës.
“Ne luanim gjithmonë bashkë.E kishim parë disa herë atë (autorin e krimit) që shihte lart e poshtë motrën. Por Zoti nuk harron kurrë. Drejtësia do të vihet në vend”-tha vëllai i Zeniadës.
“Një prej elementëve më të rëndësishëm në këtë çështje, ishte se kur nëna e babai i viktimës e kishin të vështirë të identifikonin vajzën e tyre, autori dyshuar shprehej me bindje që ishte Zeniada”-tha avokati i familjes shqiptare.
Zeniada u dogj e gjallë më 23 shtator të vitit 2011 në shkallët e pallatit ku banonte, në Pire të Greqisë. Fqinji i familjes po akuzohet tanimë për krimin e rëndë, përfshi këtu edhe për vepra tjera si tentativë për të përdhunuar të miturën e ndjerë.
Kronologjia e krimit makabër
12 vjeçarja u gjet me djegie në 80% të trupit të saj në shkallët e pallatit ku banonte me familjen, më 23 shtator të vitit 2011. Zeniada u dërgua me urgjencë në spital dhe ndërroi jetë pas 13 ditësh në agoni.
Fillimisht vdekja e Zeniadës u konsiderua si një vetëvrasje, kjo për shkak të një letre të shkruar me dorë nga vogëlushja e cila u gjend në shtëpi. Por shumë shpejt hetimet morën një tjetër rrjedhë, kur ekspertët kuptuan se vajzës i ishte vënë flaka me terpentinë dhe me një çakmak. Hetimet u fokusuan në pjesëtarët e afërt të familjes, të cilët përfunduan nën akuzë. I fundit që e pa të gjallë Zeniadën kishte qenë gjyshi i saj. Kontradiktat mes rrëfimeve të këtij të fundit dhe babait të vajzës, bënë që hetuesit të ngrinin akuza penale në drejtim të gjyshit. Pavarësisht, akuzat u rrëzuan poshtë në gjykatë e kësisoj vdekja e të miturës mbeti pa një autor. Dosja më pas u fut në sirtarin e krimeve të pazgjidhura
Rihapja e dosjes
Dosja u rihap së fundmi, 10 vite më vonë, pas një kërkese të bërë nga prindërit drejt autoriteteve gjyqësore. Këta të fundit mësuan për gjyqin në adresë të një burri, dikur fqinji i tyre, i cili po gjykohej për përdhunimin serial të një vajze të mitur, vajzën e partneres së tij. Gjatë detajeve që dolën prej gjyqit, njëri ishte dhe më domethënësi, i thënë nga nëna e vajzës së vogël e cila kishte rënë pre e akteve të rënda. Autori i thoshte të miturës që të mos i tregonte asnjeriu se çfarë i kishte ndodhur, pasi në të kundërt edhe ajo do të qante si nëna e Zeniadës.
Çështja tanimë është rihapur për autorin, i cili është aktualisht në burg me një dënim prej 14 vitesh për përdhunimin e një tjetër vajze të mitur.
Në aktakuzën e re, siç përcolli media greke, thuhet se autori dyshuar ka tentuar të përdhunojë Zeniadën, ndërsa kjo e fundit ka mundur t’i shpëtojë atij. Mandej autori, për të mos lënë gjurmë, ka vendosur që t’i marrë jetën të miturës, duke e djegur të gjallë.
“Ai ka luajtur teatër me ne, është tallur me ne. Unë dua që ai të paguajë për atë që i ka bërë time bije. Ai e ka kryer vrasjen dhe ai duhet të paguajë. Nuk e di a do të kem forcën që të përballem me të në gjyq”-tha në përfundim të intervistës së saj me Protothema-n, nëna e të ndjerës.