Këtë dimër është vënë re një rritje e lartë e numrit të infektimeve nga virozat stinore, teksa sëmundjet po zgjasin më shumë në kohë e kanë prekur thuajse dyfishin e njerëzve krahasuar me vitin që lamë pas.
Sipas të dhënave të Institutit të Shëndetit Publik (ISHP), numri i infeksioneve respiratore në 5 javët e para të vitit 2025, ishte së paku 40% më i lartë se në 5 javët e para të vitit 2024.
Veçanërisht në javën e fundit të janarit, numri i personave të prekur nga infeksionet respiratore, shkoi në afro 23 mijë persona, ose 44% më i lartë se numri i të prekurve në të njëjtën periudhë të një viti më parë.
Sipas të dhënave të ISHP-së, qyteti i Durrësit rezulton të ketë patur numrin më të lartë të të prekurve me infeksione të rrugëve të frymëmarrjes, ndjekur nga Tirana e më pas Tropoja e Gjirokastra.
Virozat e stinës më së shumti kanë prekur rëndë fëmijët dhe të moshuarit. Këtë vit virozat kanë përfunduar në infeksione serioze të rrugëve të frymëmarrjes e për shkak të zgjatjes në kohë, kanë bërë të nevojshme përdorimin e antibiotikëve.
Mjekët rekomandojnë që të sëmurët kronikë dhe moshat e vjetra duhet të shmangin vend-grumbullimet për të shmangur infektimet, ndërsa ISHP-ja nga ana e saj ka rekomanduar kryerjen e një vaksine ndaj gripit, si një mënyr për t’u mbrojtur nga pasojat më të rënda të gripit stinor.